Setirday efternin
Hauf yin
Secret conspiratorial gaggle
Ay wee auld wifies
Ay aw shapes n sizes
The hale n herty
World female experience
Congregatit easy n natural
Jist nixt tae Spoons
In the Killie toon centre
Clucking tutting plotting
Revealing winning bingo cairds,
Near-house shouts
Crumbs ay pension or wages
Bartered fir a social n
Socially acceptit sin tax.
Harsh draws oan glowing fags
Or vapes fir the modern trendy auldie
It least a couplay hundred year
Ay Scottish life experience atween thum
A charming besom’s gallery
Ay beautiful simple pained and proud
Working class desires, blushes,
Factory joabs, Johnnie Walker employment boredom
(Guid money bit)
Affairs, mairriages, holidays abroad,
Mid-last-century-mintit
Fancy foreign trips a luxury
Weans born, brought up, loast,
Wage packets angrily snatched
Fae the drunk shoutit-at man
Oan a few-pints Friday night
Sisterhood singing, swinging stinging blows
At onybidy daring tae mess wi faimly.
Pensioned-aff mammy excellence
No quite sae up-tae-date
Wi the modern world n aw this
Fad-app-gadget
Phone stuff n nonsense
Bit eywis a bawbee, ten pence,
Fifty pence, a pound, a fiver,
A tenner, a present fir a
Much-beloved roond-pinky-wrapped
Cheeky cheery cuddly ma-hert
Grandwean or twae or three
Cos some hings nivir ivir change
Nae matter how strange
N rapid the electric rivers run.
Bit enough ay that! Ladies!
Time tae get back in there!
Nae time tae lose!
Fags extinguished, vapes pocketit
Yer future could-be fortune
Is here in easy oancoming big house waves
Impossible tae predict or measure
Unlike the endless eternal
Exotic bountiful riches
Ay 20th n 21st century
Amazing Scottish female
Lives well lived and loved
N nixt tae that memorable feast
Nae fake money prize is ivir coming
Onywhaur near, nae matter whit.
END
Comments
Post a Comment